尋日仁濟醫院董事局舉行換屆就職禮，有「翡翠皇后」之稱嘅董吳玲玲接棒做主席，佢以Valentino桃紅色荷葉領外套，配襯價值近百萬元南洋珍珠頸鏈就職，貴氣十足。董太喺商界廣結人緣，老友知佢「升呢」做主席，未等佢開口已自動泵水，而佢預咗做主席後會忙到飛起，笑言即使唔做Facial都要熱心公益喎。
做得主席預咗籌款壓力唔細，但嬌滴滴嘅董太就話唔驚，表示最緊要做實事，畀人睇到仁濟醫院嘅真正需要。佢又拍拍副主席、理文造紙董事總經理Edmond李文斌嘅膊頭，話兩人感情親如姐弟，咁齊心，撲水冇難度。
董太瞓身做公益，背後原來有人撐腰，係邊位？之唔係老公董生囉。佢甜笑話先生係上海人，非常懂得體貼太太，閒來會煲花膠靚湯氹佢開心，飲完皮膚又白又滑。
Edmond家有賢妻，太太懷有龍鳳胎，六月為李家增添一個「好」字，佢仲打算送神秘禮物慰勞太太。但講到幫BB改名，就要交由爺爺「造紙大王」李運強出手嘞，事關改名要跟族譜喎。