舊年建設銀行勁賺千幾億人民幣，股價又大翻身，唔少股東都賺到笑，相信啱啱榮休嘅建行（亞洲）行政總裁Charles馬志文（圖）都應記一功。佢公務繁忙，中午成日食應酬飯，所以冇飯局時佢會叫外賣祭五臟廟。
Charles喺中環置地廣場返工，佢話如果冇應酬，附近可以選擇嘅食肆都唔係太多。過去十年嚟佢慣咗叫鏞記嘅外賣，最鍾意油雞飯，有時胃口好啲就叫多碗粥或油菜。佢盛讚鏞記嘅食物水準保持穩定，粥品嘅選擇好多，可以日日唔同款，必食之選係艇仔粥、牛肉魚片粥等。
鏞記知名嘅唔止燒鵝咁簡單，仲有好多招牌菜式，單係外賣粥品都有幾十款，豐儉由人，好似Charles推介嘅牛肉魚片粥，三十蚊就有交易。以鏞記嘅江湖地位同食物質素嚟講，都算抵食！