身兼富貴黨副主席嘅批發及零售界議員方剛，尋日提起上禮拜日喺城市論壇被班「80後」圍攻猶有餘怒，直指城市論壇已經失控，台下班人一味鬧人，根本唔畀機會嘉賓解釋，以後建制派再收到城市論壇張嘉賓邀請卡，真係要考慮吓係咪值得送上門畀人質咁話。

佢當日之所以畀「80後」狙擊，全因勇字掛心口，明知山有虎，都要上論壇，同民主派激辯功能組別存廢。佢講開又講，話現時工商界功能組別議員之中，冇乜人有能力又夠薑出嚟同民主派撼，好似最低工資以及泛民主派口口聲聲話政改要廢除功能組別呢類關乎工商界根本利益嘅議題，都竟然冇乜人敢出嚟據理力爭，真係令人慨嘆不已。

冇富貴黨領導變一盤散沙

方剛仲表明，雖然另一副主席張宇人爆出「廿蚊張」風波後，有黨內區議員因考慮到明年選情而退黨，但富貴黨仍然會為工商界據理力爭，唔會退縮。

其實，富貴黨經歷○八年直選重挫同黨內分裂後，已經有人認為工商界喺立法會內嘅黃金盛世已過，方剛嘅說話，再一次印證咗呢句話嘅可信性。自從工商界功能組別冇咗富貴黨嘅強勢領導後，就變成一盤散沙，好似最低工資爭議咁，立法會內嘅香港總商會同工業總會代表冇發表意見，反而要由總商會同工總領導層親自拆彈，可見工商界功能組別有幾弱勢。

至於專業會議嘅「4P」，梁美芬、何鍾泰同劉秀成等都係專業人士，只有石禮謙同商界勉強沾得上邊，根本講唔上代表工商界；「五散人」嘅情況亦一樣，只有一個林大輝叫做出身廠商會。一句講晒，立法會內嘅工商界聲音，真係愈嚟愈微弱，如果工商界功能組別再唔爭氣，畀人廢晒都唔好怪人囉。