小白觀點:特警成應掌動物警務處
又有賤人虐貓！繼上次彩園邨有小花貓畀人斬腳後，今次到香港仔有五隻貓仔畀人掟落缸浸英泥漿浴，搞到全身皮毛被乾涸英泥黐實，獸醫見到都冇晒符，簡直冇人性！
小弟喺動物電視頻道睇過一套《Animal Cops》，原來外國有動物警察呢家嘢，大家唔好當佢哋流呀，警員全部都受過正規訓練，出更時要荷槍實彈，同一般警察冇乜分別，仲要周不時破門入屋捉虐畜疑犯，好夠阻嚇力。
近年社會充滿戾氣，虐畜問題亦愈嚟愈嚴重，再係咁落去唔係辦法，本欄建議當局成立一個「動物警務處」，反正一哥特警成就嚟冇得撈，以佢嘅縱容濫權資歷，好適合做「動物警務處處長」一職。嗱，捉到虐貓虐狗狂徒呢，唔使客氣o架，剝光豬通櫃又好，隔住電話簿毒打亦好，甚至用埋文革酷刑都得，本欄一定支持！
Blog:http://sunsiupak.blogspot.com
阿豪觀點:冷血賤人亂用無限創意
人類嘅創意係無限，可惜好多時發揮咗喺錯誤嘅方面。好似天拿水咁，原本係用嚟清潔，又可以開油，好使好用，點知有啲人竟然用嚟索。同樣道理，英泥係一種好常用嘅建築材料，點知有個別賤人，當佢係虐待貓咪嘅工具，竟然將幾隻小花貓掟落英泥缸裏頭，簡直令人髮指呀！
最慘係，面對呢種咁有「創意」嘅虐貓方法，連獸醫都束手無策，根本唔知有咩方法可搣番甩啲水泥。咁又係嘅，情況正如「板男根」同埋「翠玉瓜男」咁樣，情況實在太騎呢，獸醫又唔係做裝修，鬼識咩！
不過唔緊要，本報請教過建造業總工會嘅代表，原來只要用暖水幫貓兒清洗，抹乾身後，夜晚喺佢哋全身搽一層薄薄嘅生油當滋潤膜，第二日再用暖水清洗就ok。至於work唔work，就要將嗰幾個虐貓嘅冷血之徒掟落去英泥度試一試喇！
Blog:http://lukchiho.blogspot.com
網友觀點
阿mui：最好就係以其人之道還治其人之身！
加菲：罪魁禍首係隨意遺棄寵物嘅人，令小動物生活喺險境中！
周仔：睇嚟係懦弱之徒將啲怨氣發洩喺小貓身上。
鷓鴣：恐怕虐貓狂徒有日會升呢向人埋手，警方應該正視！