咁都未算誇張，最離譜係瑪嘉烈醫院竟然搞出一單「滾水淥B」，簡直駭人聽聞。話說一個名叫希希嘅三個月大男嬰，日前因為支氣管炎入住瑪嘉烈醫院，點知個護士幫佢沖涼時懷疑無試水溫，將男嬰浸咗落熱水度，結果，小希希有一成幾皮膚被二級燒傷。唉，睇見一位三個月大嘅嬰兒被紮到好似木乃伊咁，仲要插住尿管幫助排尿，真係欲哭無淚！

叮！滾水淥B已經聞所未聞，更加誇張嘅係瑪嘉烈醫院居然仲想卸膊。男嬰嘅父母話，希希前日朝早七點被淥傷，但醫院拖到九點幾至通知佢哋，去到醫院後，醫生對傷勢避而不談，後來喺希希爸爸不斷追問下，先至有護士承認曾經幫希希沖涼，有人甚至惡言相向：「咁你哋咪自己廿四小時睇住佢囉！」

雙方爭持不下，病人家屬惟有報警求助，點知警方只列作雜項事件處理，於是家屬又向本報投訴。傳媒出面，醫管局先至肯認衰，瑪嘉烈醫院行政總監董秀英死死氣開記招解畫，話小希希確實喺沖涼後出現燒傷同脫皮，但係講到事發經過同責任，就話要等專責小組六星期內完成調查至知喎。

咁就奇上加奇喇，醫院烏龍，滾水淥B，成件事一清二楚，到底醫管局仲要查啲乜呢？唔使問阿貴，咪又係佢哋慣用嘅拖字訣，企圖大事拖小、小事拖無咯。正如希希爸爸話齋，「當時已有在場醫生確定希希傷勢係人為疏忽造成，但醫管局一開始就想卸膊，如果唔係東方報業集團幫我反映投訴，醫管局高層都唔會走出嚟道歉，真係好冇誠意，好敷衍！」

有護理界人士話喎，BB淥傷事件非常罕見，當局應該加強護士培訓。其實，呢啲根本唔關培訓嘅事，正常人幫BB沖涼前都會先試水溫，呢個係常識、係本能，仲使乜培訓吖。專業護士滾水淥B，係不負責任嘅表現，反映醫院管理不善，反映醫管局制度混亂，呢啲亂象唔改善，就算點樣加強培訓，都係嘥氣喇！

講來講去，公立醫院前線醫護人手不足，係醫療事故屢禁不止嘅主要原因。係人都知，近年公立醫院醫生護士持續流失，但係作為公共醫療系統頂頭上司嘅食衞局局長周一嶽一直闊佬懶理，再咁落去，睇怕唔止滾水淥B，更加離奇古怪嘅事故都會發生，叮！