小白觀點：煲呔曾應向金正日求救
中大香港亞太研究所民調結果首次確認本港唔係「和諧社會」，估計有一百五十萬人贊成以激烈抗爭迫使政府回應訴求，問你怕未！
唔係話靠嚇，同中國接壤嘅中亞國家吉爾吉斯，最近咪發生咗一場反政府政變囉，當地人民夾手夾腳推翻總統巴基耶夫，原因就係呢位老哥○五年上台後，經濟仲衰過之前，佢又任人唯親，被踢爆低價向家屬賣能源設備，仲準備將政權交畀自己人。
嘩！唔知嘅仲以為講緊嘅係煲呔曾，佢一樣係○五年上台，經濟搞到衰到貼地，爆咗單慳電膽益親家，又一心一意由鬍鬚曾接棒，似到十足十。不過唯一唔同嘅係，人哋衰咗可以溜返去南部根據地，有朝一日煲呔曾咁唔好彩，唔通要佢匿喺南丫島咩？計我話，趁早打個電話畀北韓領導人金正日，睇吓肯唔肯政治庇護兼做新義州特首囉！
Email：sunsiupak@gmail.com
Blog：http://sunsiupak.blogspot.com
阿豪觀點：睇見劉兆佳曾德成都知驚
大學民調話香港唔係和諧社會，又話有四分一受訪者接受激進抗爭行為，推斷全港約有百五萬人有咁諗。嘩，咁搞法，香港會唔會暴動㗎？
正如柏楊話齋，好多人話中華民族有五千年歷史，係唔會滅亡嘅，問題係，一個民族未滅亡之前，都係未試過滅亡嘅。大家睇吓印第安民族，夠有好悠久歷史啦，依家咩環境？況且香港並唔係未試過暴動喎，經歷過六七暴動嘅老一輩香港人，到依家講番都猶有餘悸啦！
政府聽到呢個警號，好應該檢討吓施政，點知一個劉兆佳就推卸畀市民，話社會冇共識先搞到坐困愁城；一個曾德成更厲害，竟然叫傳媒「幫吓手」。好笑嘞，傳媒一味為政府護航有咩後果，睇吓某幾份報紙銷路就知啦！本來呢，話香港會暴動，豪伯都係半信半疑，但係見到政府完全當冇件事嘅反應，都咪話唔驚！
Email：lukchiho75@hotmail.com
Blog：http://lukchiho.blogspot.com
網友觀點……
周仔：政府解決唔到社會矛盾，政客推波助瀾，暴動有乜奇？
羊咩蘇：若最低工資立法真係定為廿蚊，想唔暴動都難！
陽光：政府平息唔到民怨，到時唔係掟蕉係掟「菠蘿」添！
火龍果：市民遊行，政府好似好閒，唔通要暴動先識驚！