本文重點
新界王劉皇發人面廣、知名度高，影響力仲深入內地添。發叔早排同班老友去內地打十日高爾夫球，玩到連鬚都懶得剃，第八日打波後，大家都攰攰哋，就拉大隊去足浴館做腳底按摩。點知足浴館個老闆娘一直眼甘甘望住鬍鬚發。
老闆娘拉住要合照
發叔唔理會，個老闆娘就採取主動，行埋去話認得發叔就係劉皇發，仲拉住發叔要合照，想掛張相喺舖頭做生招牌，發叔一聽，梗係嚇到即時縮腳彈起身。
佢話，好彩當時仲有其他人喺度，否則畀人影咗張相有所誤會，就真係水洗唔清。不過，發叔好自信咁話，絕對唔擔心會畀發嬸扭耳仔，因為發嬸係個明白事理嘅賢內助喎。
去內地腳底按摩，都有人識，發叔嘅江湖地位真係冇得頂。講番菜園村搬村，發叔透露已經搵咗五幅地畀村民揀，其中兩幅好近菜園村，仲話遲啲高鐵起好咗，村民就可以係隧道地面嗰兩公頃農地耕種添！