馬圈係名人聚集地，尋日馬會大董周永健（Anthony）贏頭馬，不過佢要遠赴上海公幹，無緣到場拉頭馬嘞，只好由太太胡慕芳同兒子周郭善（Justin）做代表。講起拉頭馬，Anthony原來試過美麗嘅誤會。
原來早前有匹馬「星火燎原」喺夜賽勝出，馬主係周永健，有啲Anthony嘅朋友就即刻恭喜佢，但係Anthony話大家搞錯晒，因為香港馬圈有兩個馬主嘅中文名都叫「周永健」，當晚贏馬嗰個係真嘅周永健而佢就係假嘅。咁都得，唔係真的假不了咩？Anthony話，要分辨「真假周永健」應該睇英文名，「真周永健」叫Winston。
講番佢匹愛駒「偉感」，自○九年底出賽以來，呢匹馬一直未贏過，尋日勝出後，Anthony都唔係幾相信，問佢喺倫敦大學讀緊法律系嘅仔Justin真唔真，趁復活節假期返香港玩嘅Justin落咗一百蚊注，既贏四百多元，又代爹哋拉頭馬，真係開心到飛起。