公社兩黨發起「五區公投」爭取普選後，泛民主派陣營分歧愈來愈大，其中最大嘅裂痕就係白鴿黨，政圈消息話，白鴿黨唔肯參與兩黨辭職，彼此嘅分歧已燒到去二○一二年嘅特首選舉，公文袋嘅袋巾傑梁家傑○七年同煲呔曾鍊過一次，下次據聞佢又想出選，不過，今次白鴿黨就未必撐硬佢喇，因為大家行嘅路已經分咗岔喇。
袋巾傑○七年以「有得揀，你至係老闆」口號參選特首，攞嘅一百一十多張選委提名票中，保守估計白鴿黨最少有三十票，起咗關鍵作用，所以袋巾傑想再玩一定要問過白鴿黨，而且一票都不能少。但係，近排嘅「五區公投」，公文袋行動前冇同白鴿黨認真傾過，仲有人批白鴿黨係民主叛徒，搞到白鴿黨已經好㷫，再加上一直死硬反對小圈子選舉嘅劉慧卿加入咗白鴿黨，仲做埋副主席，下一屆特首選舉，呢啲因素都會左右袋巾傑嘅前途。
而且，據講白鴿黨中人對上次特首選舉作過賽後檢討，覺得袋巾傑參選嘅成效唔大，佢哋嘅貢獻只係白白幫咗公文袋，第日仲肯唔肯再做呢啲賠了夫人又折兵嘅生意？諗過先！
袋巾傑喺九龍東參加補選，白鴿黨人早輪都有落去幫手，佢對下屆特首選舉冇任何啟示作用。報咗名參加九龍東補選嘅仲有黎敬輝同杜森。