青協同渣打銀行尋日合辦咗個英語演講比賽，請咗傻強做頒獎嘉賓，佢仲即席以「演講」為題致詞，佢話世人未必記得政治人物做過乜，但如果講過一啲好嘅政治演說，多年之後，人民都仲記憶猶新。政治演講其實係一門溝通技巧，係向人民講述理念、增加溝通嘅方法。由學界轉入官場嘅傻強雖然畀人話係政壇新手，但呢篇說話都顯示佢嘅政治歷練深咗。

佢跟住舉咗啲例子，包括中外嘅政壇名人，中國人嘅代表係不時作感性言論嘅內地領導人，另外兩個就係美國黑人。

讚馬丁．路德金

佢話當今世上嘅演講能手一定有奧巴馬份，仲鼓勵在場人士上youtube去聽吓奧巴馬○四年一篇有關種族問題嘅演講。

之後佢又點名大讚馬丁．路德金，呢位黑人民權領袖喺一九六三年向二十五萬參加遊行嘅黑人作演講，一句「I have a dream」（我有一個夢）就熱爆四十幾年，分分鐘仲會傳頌千載添。

香港有冇例子？唔好意思，冇！雖然本港每隔幾年都有大型選舉，啲政客成日噴口水；一眾政府高官年中去埋嘅午餐會、晚宴、研討會數以千計，但到家吓都冇一篇好嘅政治演講面世，淨係呢一瓣，都可見香港政治人物唔夠班喇，政客、高官成日周圍噏，唔該提升吓自己喇！