話時話，當局推出呢個計劃，聲稱係為咗紓緩殺校危機，仲作出好多承諾，例如參與嘅學校每年可獲二十五萬元資助，而且五年之內都唔會炒超額教師，因乜事學校反應咁冷淡呢？

無他嘅，因為呢個計劃治標不治本，根本解決唔到實質問題，當局吹水唔抹嘴，話推行計劃可以提升教學質素，騰出更多教學空間，為學生提供多元化科目選擇。但係明眼人都睇得出，所謂優化班級計劃係掛羊頭賣狗肉，「優化班級」係假，「殺班」至係真，只不過畀番少少着數校方，等佢哋自己動手啫。

其實，對於名校嚟講，根本唔憂收唔到學生，佢哋點解要減班噃？而嗰啲真正收唔夠學生嘅二、三線中學如果參與計劃，又怕被標籤為「不受歡迎」學校，以後更加難收生，豈不是死得仲快？再講，有啲中學就算肯自願減班，都未必可以繼續生存落去喇。

仲有吖，話就話五年內唔會炒超額教師啫，但係以後超額教師愈嚟愈多，政府唔通全部養起咩。教師飯碗隨時不保，士氣低落，影響教學質素，最終受害嘅咪又係學生。

自願減班計劃出師不利，反應冷淡，正如有校長話齋，一個區得三兩間學校參與，每間學校減一個班，根本幫唔到乜嘢，因為家陣每個區閒閒地都少收咗二、三十個班嘅學生。佢哋話，惟有實行小班教學先至可以真正紓緩殺校危機。

所以啫，呢個計劃治標不治本，根本解決唔到生源不足嘅問題。本來呢，學校收唔到學生，最後嘅結局就係殺校，但由於政府跛腳，動輒得咎，怕引起教師抗爭，惟有迴避矛盾，求其推出呢個自願減班計劃，暫時止吓咳。

之但係，本港出生率每況愈下，學校生源不足係長期嘅問題，「殺班」一類小修小補，只可以頭痛醫頭、腳痛醫腳，根本無補於事。

事到如今，殺校亦好，推行小班教學亦好，如何抉擇，當局點都要面對。如果再採取鴕鳥政策，自欺欺人，盞添煩添亂，遲早自食苦果，自討沒趣。叮！