小白觀點：「丹素華盛頓」贏晒印象分
近排航空業真係新聞多多，繼國泰空服員工潮之後，依家又到聯合航空員工爆抗爭，不過佢哋冇惡形惡相挾持乘客當籌碼，只係喺機場派派傳單。最值得一讚嘅係，佢哋唔使戴晒口罩遮住個樣，嗰個工會主席仲成個丹素華盛頓咁款，講嘢不亢不卑理直氣壯，爭取到唔少粉絲支持。
本欄都好同情佢哋，因為聯航咁多甩漏，意外無日無之，返工真係名副其實搵命博㗎。最離譜嘅係，成班高層一個二個高薪厚祿，發到豬頭咁，但係前線就要減薪削福利，員工當然谷爆啦！
不過依家航空業真係冇運行，要飛都唔知搭邊一間好，國泰空服員郁啲嗌罷工，聯航又咁牙煙，嗰間澳航又係一擔擔，唔係漏油就係機翼有問題，成日都飛飛吓要折返。所以本欄諗過度過，復活節假期都係匿喺屋企玩PS3遊戲HAWX，打飛機打得不知幾個癮呀！
Email：sunsiupak@gmail.com
Blog：http://sunsiupak.blogspot.com
阿豪觀點：空服員兼職清蛇蟲鼠蟻
唔知點解，呢排啲航空公司好似約埋咁，一齊搞工業行動，國泰工潮啱啱落幕，聯航員工又爆工潮。不過聯航員工確係值得同情，佢哋啲航班經常出狀況，空服員買驚風散都要錢啦！
呢嗱，聯航一班由華盛頓飛丹佛嘅航班，日前就發生恐襲驚魂嘞，話有人喺機艙裏面企圖燒自己對鞋喎，雖然事後證明只係有人喺洗手間食煙，但係已經搞到一頭煙，仲要出動戰機護航。
擔驚受怕唔在講，佢哋啲空服員有時仲要撈埋滅蟲公司嗰瓣。唔知大家記唔記得，兩年前聯航一班航機，竟然喺萬呎高空上嘅航班發現老鼠，呢單嘢當時引起各方關注，而之後似乎冇再發生過類似事件……吖，唔知係咪真係要空服員幫手清理蛇蟲鼠蟻呢？係囉，一人身兼幾職，都仲話要削減待遇，唔嬲就假囉！
Email：lukchiho75@hotmail.com
Blog：http://lukchiho.blogspot.com
網友觀點……
小虫：聯航員工冇遮冇掩敢以真面目示人，畀到人理直氣壯嘅感覺！
B仔：高層獲巨額花紅肥上瘦下，又係典型無良僱主。
狒狒：聯航啲安全紀錄一向差，又刻薄員工，呢份工真係唔易做！
鷓 鴣：佢哋揀長假期後先至行動，值得外界支持加分！