壁球好手○八年曾傳火炬

珮軒○○年喺第十屆亞洲壁球錦標賽女子團體項目中勇奪金牌，○六年喺多哈亞運單打賽贏到銅牌，去年香港東亞運又喺女子團體項目奪金，成績卓越。做得運動員，新傷舊患當然唔少得，加上佢父母長年接受中醫治療，令佢對中醫產生濃厚嘅興趣，所以立志退役之後要投身中醫事業。兩年前，佢仲開始修讀中醫同針灸嘅課程添。

今次佢入大學獲得體育學院資助大學學費，中大亦有獎學金畀佢，不過生活費就要靠珮軒自己畀，佢話咁多年嚟都有多少積蓄，閒時仲可以做教練搵外快。唔講唔知，珮軒○八年做過奧運火炬手，之後佢捐咗支火炬同火炬手服飾出嚟拍賣賑災，立法會議員林大輝以一百八十萬元投咗，之後再轉送番畀珮軒。