上海市政府邀請本港立法會議員下月去睇世博之後，立法會內會尋日討論個旅行團細節，秘書長Pauline吳文華匯報下月八號出發嘅旅行團行程，仲透露團費為九千五百蚊人民幣，當中四千幾蚊係交通費，其餘就主要係膳食，兌換番港幣，呢個團嘅團費高達一萬零八百蚊，真係貴到離晒譜。
根據佢哋嘅行程，議員會坐高鐵、聽鐵道部專家同港府高級工程師嘅介紹，然後喺上海參觀中國、香港同澳門嘅展館，另外仲可以睇英國、美國同日本館，最後一日再去埋城市最佳實踐區，然後坐飛機返嚟。三日兩夜點解咁貴呢？旅遊界議員謝偉俊表示，早前佢自行建議立法會搞番個四日三夜高鐵世博團，都只需三千三百八十八啫！Pauline解釋佢哋呢條數係粗略估計嘅上限，未有實數，筆錢會喺每位議員嘅定額外訪津貼度扣喎。之但係，立法會官式訪問嘅團費搞到幾乎係一般旅行團嘅三倍，都好過分啦！
白鴿黨副主席劉慧卿尋日表明唔賣帳，話除非內地向包括佢在內嘅無證議員重發十年期回鄉證，否則佢今後都唔會參加呢類一次過嘅政治騷內訪團，「有我劉慧卿喺立法會一日，都唔會有全體議員（訪內地）﹗」家吓已經有幾個議員揚言杯葛個團，遲吓睇怕會愈嚟愈少人。