西九管理局請咗原倫敦巴比肯中心藝術總監謝卓飛來港做西九嘅新行政總裁，但謝嘅背景就惹嚟好多質疑，最大問題係認為佢只識西方藝術，唔曉中國文化。尋日西九管理局發表電子通訊，特登同鍾意人哋叫佢做Graham嘅謝卓飛做咗篇訪問，Graham喺訪問中大講佢鍾意亞洲藝術同中樂，又期待探索香港同中國嘅風光、聲音甚至味道等，可惜呢啲硬銷都係畀人感覺似補飛、做戲多啲。
Graham呢篇訪問大賣感性，由佢祖輩講到父母，同自己點樣接觸音樂，連佢嘅第一張唱片係披頭四、第一個夢想係做導演，甚至二十六歲入咗英國廣播公司做監製等都一一披露。佢話嚟香港後，會喺住所擺部鋼琴，亦會多啲欣賞中國藝術，又話家吓雖然唔係亞洲藝術嘅專家，但喺本港期間，應該有本地藝術大師令佢着迷。
講完藝術之後，Graham透露佢好鍾意落廚，亦係一個唔錯嘅廚師，煮得一手辛辣好餸；佢又鍾意滑雪、打網球同高爾夫球。不過，佢宣傳「我愛中國藝術」太着迹，旨在為自己出任新職掃清障礙，結果反令人感覺不倫不類。