本文重點
保良局董事會尋日換屆，主席何志豪（David）落莊，交棒畀做開紙業生意嘅呂鈞堯（Quincy）。David回憶任期軼事，慨嘆主席唔易做，佢話咪睇各副主席、總理喺電視機前打扮華麗，其實風光背後付出唔少汗水。佢賣身為保良雖然未至於「三過家門而不入」，但放喺保良嘅時間仲多過自己間糖果公司，依家交咗棒要多啲返公司開會至得。
保良東華約定互訪
David喺經濟低迷下出任保良一哥，「撲水」難上加難，但佢「吸水力」依然強勁，總善款收入破紀錄高達二億港元。新任主席係擁有一張Baby Face嘅Quincy，佢話未驚過新挑戰，本身係興泰行洋紙有限公司董事嘅佢，已經服務咗保良局八年，喺商界人脈廣博，「撲水」應該難佢唔倒喎。
就職禮儀式後，夜晚仲喺會展筵開三十幾席，前東華三院主席兼鐘錶大王孫秉樞都有撐場。何解保良晚宴會有東華嘅人出現呢？原來孫生早年拉埋當時嘅保良局主席方潤華，創立「東保是一家」理念，提議東華同保良兩邊董事局核心成員每年碰頭一次，所以每逢東華或保良嘅董事局就職禮，「兩家人」都會互訪，傳統至今不變。