花弗強尋日以離島區議會主席身份出席東涌社區會堂嘅開幕禮，被問到補選投票動向時，佢好醒咁話：「四區補選呀？」竟然當咗下個月嘅補選只得四個選區，我哋同佢澄清係五區補選後，花弗強面不改容咁繼續答：「我會去投票，盡公民責任『選賢能』。」更落力呼籲其他市民都趁當日去投票。

之不過，鄉議局早前已經決定同本港多個建制派團體聯手杯葛「五區公投」，身兼行政會議成員嘅鄉議局主席「發叔」劉皇發曾公開批評過今次補選「冇需要、冇意義」，另一個副主席張學明更加話有啲反對「公投」嘅鄉紳，嬲到唔想借啲村校出嚟做補選投票站。點解花弗強同鄉議局嘅立場背道而馳呢？

澄清非甩底避傳媒

花弗強冇詳細解釋，但就好緊張早排區議員津貼失蹤嘅事，佢話單嘢佢已經報咗案，不便多講，但就酸溜溜咁主動澄清早前缺席西貢車公古廟嘅重開典禮，係有事先請假嘅，唔係如外間所言咁忽然甩底避傳媒。

據講，花弗強喺單津貼醜聞爆出前，同鄉議局已面左左，到醜聞被踢爆後，發叔曾經冷冰冰咁講過「清者自清」，而花弗強幾次解畫，都冇鄉議局嘅頭面人物撐場，家吓佢又「忽然民主」，唔通真係當鄉議局冇到？