因乜事咁急要立法呢？事關近年對兒童性侵犯個案愈嚟愈多。好多風化案都同教師、校長扯上關係，近日又有單新鮮滾熱辣嘅畸士，一位「七十後」教師竟然以影o靚模相作藉口，吸引一大班「九十後」女童影裸照。

咪以為呢啲賤男一定係樣衰兼猥瑣，佢哋平時西裝骨骨，道貌岸然，點睇都唔似鹹濕佬，叫細路又點分得出係好人定係壞人呀。更弊嘅係，當局對呢啲淫師嘅犯罪紀錄，又收得密密實實。嗱，有一個男教師曾經喺港鐵站偷拍裙底被定罪，但係又去另一間中學重執教鞭。後來被學生踢爆，搞到人心惶惶，啲女生驚被拍裙底照，惟有着多條打底褲。

淫師犯過事，留咗案底，教育局冇紀錄嘅咩？教育局梗係有紀錄啦，但係唔會主動將紀錄交畀學校，亦唔會強制校方查閱受聘人嘅犯罪紀錄。所以嗰啲有性犯罪紀錄嘅人咪有機可乘囉，卒之又係搵啲細路嚟搞。叮！

所以，輿論一早就建議設立性罪犯名冊，但係，當局遲遲冇行動，話怕洩露有關人士嘅私隱，亦不利性罪犯嘅更生喎。

咁講實在太荒謬，冇錯，維護人權同私隱係重要，但係唔可以凌駕公眾利益之上，更加唔可以犧牲兒童嘅利益。畀機會失足者改過自新，亦冇人會反對。但係正如有專家話齋，性罪犯重犯機會好大，嗱，有個孌童犯曾經搞過百幾個細路，踎完出嚟又繼續作案，仲話「見到細路仔就忍唔住」添。如果為咗保護私隱，任由呢種人混入校園，等於送狼入羊群。

喺輿論壓力下，法改會今年二月發表報告書，建議採取臨時措施，設立行政機制，令僱主請人從事與兒童有關工作嘅時候，可以查核僱員嘅性罪行紀錄。但係有保護兒童組織就話，有關建議過分考慮曾犯罪者嘅人權及私隱。仲有，設立資料庫只係臨時措施，如果不立法，邊有約束力呀？

所以有議員話齋，靠臨時建議嚟保障兒童係唔夠嘅，應該快啲立法。政府就話，依家嘅建議係臨時嘅，日後一定會立法，但就冇時間表。講到尾，又得個拖字。

其實，好多歐美國家都有相關法例，美國唔單止立法設立性罪犯名冊，仲可以供公眾查閱。嚴重性罪犯刑滿出獄，仲要戴電子腳鐐，由警方掌握行蹤。有啲國家仲立法對孌童者實行化學閹割。反觀香港，話就話係法治社會，居然連立法保障兒童免受性侵犯都前怕虎後怕狼。唔通咁就叫做以民為本咩？叮！