小白觀點:應向水貨佬徵Gadget稅

千呼萬喚嘅iPad終於登場有得買，弊在香港近年已經淪為二三線城市，今次冇福分同美國接軌同步有得玩。不過大家唔使擔心，香港商人嘅腦筋向來轉數高，呢嗱，唔使三幾日，已經有大把水貨應市，但講到價錢囉喎，16GB版本竟然要近七千蚊，真係唔講得笑！之不過咁嘅癲價，依然仲有大把人爭住買，你話奇唔奇嘞！

小白老弟都係Gadget迷，見到部iPad都心思思，好想整番部先玩為快，但始終覺得呢個價確實離晒罩。喂，反正Spec又差唔多，買四部iPod touch 8GB綁埋一齊，連埋卷封箱膠紙都唔使呢個價啦！而且四部夾夾埋埋，一共有32GB添，容量大得多。

有人買新界樓花揸一年賺五百萬，稅局都話要追殺啦，依家iPad揸三日就收多六七成，稅局係咪應該一視同仁，開番張黑名單向水貨商徵收「Gadget稅」呢？

Blog:http://sunsiupak.blogspot.com

阿豪觀點:零件成本只值售價一半

雖然有讚有彈，但iPad一推出已經出現炒風，好似話要成差唔多七千蚊，內地方面據聞個價去到八、九千蚊添！唔知大家覺得值唔值呢？

其實各人有各人嘅心頭好，值唔值呢家嘢始終係比較主觀。不過豪伯就睇到一篇報道，話有專家將iPad拆骨，逐樣逐樣計吓數，發現一部16GB iPad只係值二百六十美元左右，比定價近五百蚊似乎差咗一大截喎……當然啦，呢條數係冇計到開發軟件同廣告宣傳等費用。正如有人講過，如果將人體內嘅化學物質同礦物質成分加起上嚟，都不過係十元八塊，唔通因為咁廿蚊張就有道理咩？

點講都好啦，豪伯都係睇定啲先至買，一來以蘋果嘅往績，iPad好快就會精益求精，試問如果你當初買咗第一代iPod，今日仲夠唔夠膽拎出街呢？二來就算要玩，都等小白兄買咗之後，借佢嗰部嚟過吓癮先啦！

Blog:http://lukchiho.blogspot.com

網友觀點

鵪鶉：冇咁笨去接炒家啲貨，等個價合理先至買。

周仔：市場上不斷推出I字頭嘅產品，點買得咁多呀！

龍仔：太誇張喇，炒到咁高，不過我都信會有人買。

瘦皮猴：個價錢咁貴點捨得買呀，用番Netbook算啦！