順德人識飲識食，香港足總主席梁孔德都唔例外，仲成日心掛掛家鄉菜，一得閒就會返去食番餐。原來順德菜有好多名堂，有啲仲連呢個為食之人都唔敢試。
時下港人形容一啲嘢冗長，會話好似「水蛇春咁長」，原來「水蛇春」真有其物，即係水蛇嘅卵子，梁主席話佢真係見過水蛇嘅春，確係好長，順德仲有得食添，不過佢唔敢食，而水蛇湯佢就夠膽飲，仲大讚奶白色嘅湯水好鮮甜。其他好似大良炒牛奶、焗禾蟲、炸蠶蛹炒芽菜等，都食到梁主席耳仔郁。
可惜順德菜食材好難喺香港搵到，焗禾蟲呢味菜好似同香港絕緣咁，所以搞到佢耐唔耐就要返去祭五臟廟，而依家交通方便，一粒鐘就上到去。話時話，之前梁主席太太梁劉柔芬話要感染老公齊齊低碳飲食，蠶蛹營養價值高，唔知梁主席會唔會反介紹畀太太呢？