立法會議員係民意代表，銜頭前有尊貴兩個字，不過，港九勞工社團聯會嘅立法會議員李鳳英就話，議員份工工時太長，做議員仲慘過幾十年前嘅女工！點解咁講？事關佢同姊妹、工聯會副會長林淑儀尋日話當年，諗起以前做電子工廠女工嘅歲月就好感慨。
英姐尋日出席汽車交通運輸業總工會慶祝成立九十周年酒會，同林淑儀老友鬼鬼雞啄唔斷。佢哋話，幾十年前大家做緊電子廠女工嘅時候已經相識，憶當年佢哋都好興奮，唔知係咪諗起當年青春正茂、拎住保溫飯壺返工嘅日子呢？英姐話好懷念當年，家吓佢雖然做咗議員，但每日都要做成十幾粒鐘，功能組別議員又畀人標籤，好似係社會罪人咁，認真惡頂。
呢對工會姐妹花加入工會後成日一齊合作，之後英姐以勞工界功能組別代表身份入咗立法會，而林淑儀就做咗工聯會副會長，仲嫁咗畀立法會議員黃定光。英姐雖然貴為尊貴議員，但佢就似乎羨慕林淑儀多啲，佢話林淑儀嘅銜頭係立法會議員夫人，多過佢兩粒字，所以尊貴啲喎。