四川大地震轉眼發生咗兩年，本港醫護界會喺嚟緊嘅五月遠赴四川送暖，多個醫管局高層更會大演身手。沙士醫生兼新界東聯網總監馮康，會喺五月聯同九龍西聯網總監董秀英，帶領醫管局中樂團遠赴四川，為震災傷員、康復勇士同當地嘅醫護人員義演，佢哋先探訪四川都江堰友愛學校，再到四川省人民醫院舉行一場名為「川港同心滿杏林」嘅音樂會義演。
唔講唔知，馮醫生唔只醫人叻，佢拉二胡都有一手，聽講音樂會當日，馮康會拍住一代二胡宗師黃安源同台演出，合奏一曲《獅子山下》。
醫管局主席胡定旭都會表演番兩手，不過肥胡就唔係拉二胡，而係同董秀英醫生合唱番首《萬水千山總是情》，屆時馮康仲會為佢用二胡領奏添。唔少人都好想睇呢個醫護鐵三角嘅同場表演，可惜佢哋「只可一不可再」，暫時冇打算喺香港encore。