公文袋、社民連為「五區公投」搏到盡，希望谷高補選投票率，白鴿黨喺呢件事同佢哋有心病，該黨立法會議員甘乃威更聯同東區區議員梁淑楨及趙家賢，喺正下月十五同十六號（投票日）合辦母親節東莞美食兩日團。
個團入住五星級酒店，會享用客家風味宴同一魚三味養生宴，並參觀多個景點，禮拜日投票日仲要食埋晚飯至返歸，咁搞法會對投票率有乜影響係人都知，有冇手尾跟真係好難講。
負責策劃東莞團嘅梁淑楨解釋，該黨已經搞咗母親節團好多年，一向遲母親節一個禮拜出發，等一眾母親可以喺正日同仔女慶祝，而且佢哋一早決定咗出發日期，唔係選舉事務處公布補選日期後至決定，所以冇存在任何陰謀。佢仲寫包單，話十六號當晚九點幾就會返到嚟，有足夠時間畀選民投票，但選民投唔投票就要自行決定嘞！