香港汽車會（AA）主席雲維熹（Wesley）係前全國政協委員雲大棉大仔，亦係成吉思汗第二十九代傳人，不過佢嘅「車癡」身份更廣為人知。
Wesley玩過無數靚車，屋企仲有數以百計嘅玩具車。佢依家係國際汽聯（FIA）亞洲區主席，係第一位香港人躋身FIA核心。佢正籌劃一場亞洲車手參與嘅亞洲區賽車盛事，賽場初步定喺內地，希望年尾或明年可成事。
佢唔單止鍾意車，仲情迷於砌機場模型，佢嘅機場入面有跑道、草地、機場大樓、工程車同各式各樣嘅飛機仔，經常砌完欣賞一排之後再拆過「重建」，所以對機場嘅一事一物瞭如指掌。佢話好想加入另一個「AA」、即香港機場管理局（Airport Authority）董事局，又想加入智囊組織，為香港政治民生事務獻計。