本文重點
本港年輕人對社會嘅怨氣愈嚟愈多，舊年年尾，一班「80後」青年人藉高鐵抗爭騷實力，今年呢股怨氣可能蔓延到「90後」，事關已經開始嘅中學會考係新高中學制落實後嘅最後一屆，末代會考生最大嘅特色係「冇退路」，因為冇重讀機制，所以啲考生自嘲「有前冇後」、「零失手」。近日主要科目試期臨近，唔知係咪壓力大得滯，唔少考生、家長甚至師長近日都喺網上、電子媒介發炮，斥責政府懶理考生死活，仲要求教育政策嘅守門人、教育局局長孫明揚快啲出招！
眾家長老師亦心噏
新高中學制推出以嚟，教育界忙於討論銜接安排，末代會考生嘅權益較少受到關注。近排考試逼近，問題逐漸曝光，但政府仍然無動於衷。復活節期間，末代會考生一邊忙應試，一邊喺網上呻苦，唔少人都大嘆壓力逼到爆煲，佢哋嘅家長、老師亦好心噏。
一個末代會考生嘅老師就喺教育局政治助理楊哲安（Jeremy）嘅facebook訴苦，代學生訴不平。佢話，好多末代會考生憂心前途，有人擔心冇得重讀，有人就擔心第日嘅新高中學制考試同會考唔同，甚至有家長眼見末代會考生咁辛苦，亦食唔安、瞓唔樂……呢啲言論近排喺網上討論區、電台節目愈嚟愈多，但政府卻冇乜反應。
依家啲考生忙住考試，件事暫時仲處於風平浪靜嘅階段，但八月會考放榜，呢班冇退路嘅末代會考生必定成為社會焦點，到時學生情緒、學制轉移等炸彈都可能會爆，政府如果再次後知後覺，「90後」除咗抱怨社會不公，仲有乜嘢可以做呢？為免社會和諧情況更差，孫公呢個官場拆彈高手睇怕都要快快出招至得。