因為荷里活電影《阿凡達》創史上票房傳奇，令擁有三千奇峰嘅湖南張家界再掀旅遊熱。富貴黨常委田北辰亦趁復活節假同太太、囝囝Lester去張家界玩咗幾日，此行以觀賞風景為主，田二少請咗個御用導遊同司機，載佢四圍觀光，可惜個司機唔多掂，全程狂煲電話粥，頻頻單手揸軚盤，最慘係聲浪太大，掃晒田二少一家睇風景嘅雅興，就算田二少投訴，佢都當耳邊風。
激氣事接踵而來，往張家界途中要坐三粒幾鐘車，田二少中途停車幫襯當地小店，價錢雖然平到笑，但食材就麻麻哋嘞。佢叫咗沙鍋鴨同梅菜扣肉，點知隻鴨皮包骨，冇乜肉食，扣肉亦只得肥豬肉，再嚟多一碟雞，都係骨多肉少。佢怕辣，惟有叫碗例湯送白飯填肚就算，認真冇啖好食。
好彩沿途巧遇唔少香港人，大家上山落山都有打招呼，有啲仲問田二少攞簽名添！竟然有粉絲，睇怕田二少即刻開心番晒。