為咗令年輕人多啲了解珠三角嘅發展，美昌集團副總裁兼廠商會副會長顏吳餘英，日前為經濟動力大開韶關玩具廠房之門，畀近百名大學生參觀，當日除咗顏太同丈夫顏培英負責接待外，顏家接班人Roger顏志永都有現身幫手。Roger喺舊年獲頒香港青年工業家獎，而媽媽亦早喺九六年已獲同一殊榮，兩母子皆獲同一獎項，分外珍貴。
顏太對囝囝獲獎固然開心，而更值得高興嘅係屋企生意有第二代接棒，一家人齊心分工合作管理好間公司。顏太同丈夫四十年嚟對工業發展充滿熱誠，而且不斷創新產品，令「Maisto」系列玩具成為國際市場知名品牌，所以顏太勉勵大學生，話工業唔係夕陽行業，因為就算經濟再好，如果冇工業製造消費品，經濟活動都難以發展，期望年輕一代畢業後考慮喺工業界發展喎。