本文重點
由高鐵撥款引發嘅新一波管治危機沒完沒了，「80後」青年愈走愈前，企喺抗爭最前線，高喊煲呔曾政府漠視青年人聲音。早前運輸及房屋局局長鄭汝樺嘅一場facebook大龍鳳，畀外界狂轟做政治化妝，於是政府又象徵式將青年事務委員會換屆，意圖以降低委員會平均年齡去減低民怨，但亦只係換湯不換藥，年輕人當然唔收貨。班「80後」對政府嘅不滿燒到沸點，逼到煲呔曾政府要開腔話會搞多啲網上諮詢。
早前特首辦主任Raymond譚志源出席公開論壇時，雖然承認政府要優化使用新媒體嘅政策，但就大呻若要班問責高官個個開facebook、twitter等網上交流平台，實行起嚟好困難，既要搵人二十四小時回覆，又話政府要「牙齒當金使」，唔可以亂講嘢。講到尾，佢都係唔肯講一句各官會落力做嘢。
Raymond曾揚言一個月內會開設facebook，睇嚟係為咗將來嘅改革鋪路，但我哋就八到佢想雙管齊下，事關佢仲會為班副局長同政治助理製作一份《網上交流指引》，教吓佢哋點用facebook及twitter同市民交流，兼且教埋佢哋嘅應對技巧，等班官唔好開口夾着脷。
坦誠及政治智慧最重要
聽聞喺回應市民提問上，Raymond嘅指引就傾向寬鬆少少，唔會好似食帶咁不停重複官方立場，費事搞到網民更加火滾，但又唔可以偏離官方立場太遠，否則又變咗無視集體負責制。
框架係死嘅，對話係生嘅，一份指引究竟幫到啲副局同政助幾多真係估唔到，但Raymond想補鑊就路人皆見。講到底，官民溝通除要坦誠外，仲需要有政治智慧，嗰班副局同政助跟住指引嚟做，只不過係墮入另一個「錄音漩渦」，到時好有機會成為網民另一個狂插目標，咁Raymond就要小心啲搞喇，否則分分鐘會作繭自縛。