香港科學園上月底起一連五個周日喺啱啱命名為「高錕會議中心」嘅「金蛋」，舉辦「金蛋FUN FUN日」活動，歡迎市民一家大細參與，仲有免費接駁巴士接送往返港鐵車站。無分老幼齊齊Happy，又適逢復活節長假，梗係捧場啦。原來呢個只係美麗嘅誤會，有市民畀隻「金蛋」玩鑊甘。

嗱，件事係咁嘅，吳先生前日帶埋年屆八十嘅媽媽同兩個月大BB，一家十口去到科學園，參加完活動之後，見告示話有接駁巴士，諗住搭巴士返沙田。點知上車時畀司機拒絕，理由係佢媽媽用嘅摺合輪椅同BB架嬰兒車唔上得車，摺埋都唔得，仲話「運輸署法例有規定」。理論一番冇結果，焗住搭的士離開。正一乘興而來，敗興而歸。

叮！輪椅同嬰兒車唔准上車，分明係人為設置障礙，歧視老弱啫。「無障礙運輸」原來得個講字，唔怪得當事人質疑「依家咩年代」啦。正如有殘疾人士組織負責人話齋，上世紀六、七十年代，輪椅都已經上得旅遊巴或者校巴，依家直頭係「社會大倒退」，輪椅使用者社交活動權利被無故剝奪，平時得閒到抽筋嘅平機會係咪應該跟進吓呢？

吳先生事後致電政府熱線查詢，發現法例並冇規定摺妥嘅輪椅同嬰兒車唔上得旅遊巴，即係有人玩歧視啦。問題係，法例明明冇禁止咁做，科學園同旅遊巴服務商居然可以自訂「禁令」，運輸署點解唔理？唔通真係可以隨心所欲無王管？

嘥氣啦，講到歧視，查實港府自己都其身不正。呢，旺角亞皆老街同登打士街之間嗰段彌敦道，頭尾兩個行人過路處相隔幾百公尺，中間得一條行人隧道橫跨彌敦道，但條隧道唔止冇殘疾人士專用線，連升降機都冇。咁嘅白癡設計，運輸署擺明係歧視長者同傷殘人士啦。

政府冇愛心，管理全港大多數公共屋邨商場嘅領匯，一樣縮骨到冇朋友。好似藍田德田商場咁，領匯藉口翻新商場，將唯一嘅客長期停用，長者同傷殘人士被迫冒險改用自動扶手電梯；坐輪椅嘅長者甚至要爭坐「貨」，或者用行車斜路上落，險象環生。

計太一叮話齋，如果港府對或明或暗、無處不在嘅歧視繼續放任唔理，香港遲早變咗周圍有障礙，處處冇關愛。叮！