本文重點
早前九巴董事William雷禮權為咗慈善，扮行會成員「金刀梁」梁智鴻，維肖維妙，成為城中佳話。原來「金刀梁Look」並非佢首選，佢嘅心水實係扮「十八銅人」，已經試咗一次妝，點知突然收到民政事務局前常秘「媽打」李麗娟急Call，佢惟有「奉召」扮金刀梁，銅人造型只珍藏喺iPhone手機畀自己欣賞。
翻新舊屋為興趣
早兩日William急不及待展示從未曝光嘅造型。佢話呢個裝化足兩、三粒鐘，多得太太利蘊珍借出深色粉底同閃粉眼影。佢皮膚白滑，上妝冇難度，自己將啲閃粉鋪滿面部、肩膊同頭頂髮絲，再搽埋黑色眼影加深輪廓，效果媲美荷里活特技化妝師。
扮得咁投入，皆因佢鍾意扮靚，而佢另一嗜好就係翻新舊屋，不時喺日本同英國發掘有潛質嘅物業，翻新後出租，佢笑稱：「我唔當係一門生意o架，係嗜好至真，因為我鍾意靚嘢。」