教育局政治助理Jeremy楊哲安早前因為約一班喺facebook批評過佢嘅「80後」青年食飯不遂，喺facebook爆咗句「搞對抗的人士要如何才會接受我的邀請，坐下一起溝通？」而被網民圍剿，有人話佢標籤異見人士，有人就寸佢約女仔出街失敗都冇理由話人哋「搞對抗」。事隔幾個月，一班「80後」終於肯同佢食餐飯「溝通溝通」。
知情人士話Jeremy約佢哋食飯足足約咗八個月先約到，當日應邀嘅包括青年聯舍、網台「青台」同青年組織「Ytalk!」嘅中堅分子等六個人，討論嘅話題上至青年嘅住屋同就業問題，下至性教育同「80後」文化，總之乜都講一餐，連佢老婆有咗都講埋。
有與會嘅「80後」透露，在場有人重提Jeremy喺facebook狂言單嘢，佢聽到後就表現得尷尷尬尬，仲話都知自己撞咗板，以後會小心啲，唔會再亂講嘢喎。
咁即係沙冧啦，係咪想博好感呀？有「80後」話同佢食完飯後，覺得佢幾有誠意去了解群眾心聲，都唔係好似外間所言嘅「二世祖」咁衰啫，仲話雖然佢嘅政治技巧有進步空間，但算係比其他政助主動，「好多官都識用facebook同人溝通，但佢真係示範到facebook可以點用囉。」
睇見呢個飯局有洗底機會，Jeremy話下次要嗌埋勞工及福利局政助莫宜端嚟添！呢啲就叫做食住上嘞！