尋日沙田馬場舉行復活節賽事，富貴黨嘅「廿蚊張」張宇人嘅愛駒「越跑越有」愈跑愈冇，最後三甲不入得第四名。廿蚊張近日因最低工資畀人插到遍體鱗傷，心情唔多靚，尋日講起低碳食物，忽然借題發揮怒插食物及衞生局局長周一鑊，話佢剝削市民選擇低碳食物嘅機會。
廿蚊張日前上電視幫手推動低碳生活時，雖然自爆無肉不歡，但佢都好支持低碳食物，尋日重提呢件事，佢忽然連珠炮發咁話：「最衰都係周一嶽，雞同豬呢類低碳動物唔畀人養，搞到市民少咗好多食低碳食物嘅機會，相對牛隻排放二氧化碳勁好多！」
「廿蚊論」搞到滿城風雨，更引發退黨潮，廿蚊張慘變富貴黨嘅負資產，問佢會唔會退黨止血時，佢斬釘截鐵咁話：「唔會！」又話有黨員退黨唔止喺佢個黨發生，其他政黨嘅黨員都會有出有入，相當平常喎！