白姐姐孖住佢嘅好拍檔、立法會旅遊超人阿Paul謝偉俊，以襯到絕嘅一身白色打扮，去到長沙灣一間酒樓收集提名。有份簽名嘅陳先生話覺得白姐姐「幾得意」，所以支持佢，但就強調佢純粹想多啲人出嚟參選，要佢喺補選度投白姐姐一票就咪搞嘞！呢盆冷水真係兜頭淋。跟住另一位食客簽完名後，仲問身邊友人：「佢係咪出嚟選區議員？」雖則係咁，白姐姐話好有信心一日內可以收集到三百個簽名。係咪自我感覺良好咋？

白姐組又話佢有好多台灣嘅歌星朋友，因為唔鍾意台灣嘅政治文化至移民嚟香港，點知依家毓民又喺議會掟嘢，搞到班小朋友以為掟擦紙膠「好威威」，所以佢決定要出嚟撥亂反正。佢仲話自己講嘢咁慢，可以「以慢打快」喎。不過，白姐姐係咪使得出呢招，都要睇佢最後係咪真係遞表參選o架！睇吓點？