先排套《葉問》大熱,激起市民習武嘅興致。早前見到有份投資套戲嘅武術總會副會長冼國林,佢話本港好多武術道館生意突然好咗,學員少則增加五成,多則暴增三倍,所以佢決定乘勝追擊,再投資約五千萬元拍攝《葉問前傳》,一半為投資、一半為興趣,希望藉此推廣詠春。
要拍出正宗佛山味道
冼國林係葉問個仔葉準嘅徒弟,習武二十幾年。《葉問前傳》係講述葉問點樣由一個後生仔變成一代宗師,所以冇大明星排場,主角係冼國林嘅徒弟杜宇航,佢係最年輕嘅世界武術冠軍。八十幾歲嘅葉準亦會喺戲中飾演一角,四代人一脈相傳,都幾有賣點。
冼國林仲話呢套戲要拍出正宗佛山嘅味道,因為佢師傅、老婆、杜宇航同戲中五十個師傅都係佛山人喎!