本文重點
立法會研究雷曼事宜小組委員會由開工到依家足足一年有多,等到頸都長,卒之等到班有份賣迷債嘅「賓架」,逐一排隊上立法會受審。
今個月開始,星展、渣打、花旗、荷蘭、中國同埋大新銀行會逐間上立法會雷曼小組受審。官方講法就話排名不分先後,不過我哋聽聞,其實雷曼小組傾次序嘅時候諗過,先審嗰啲處理迷債事件最唔嗲唔吊、對苦主態度最差嘅銀行。究竟邊個講法先啱?看官自己判斷喇!
今個月十六號被傳召上立法會嘅係星展行政總裁葉約德,成為首個出席聆訊嘅賓架,唔知係咪因為作為銀行界嘅頭炮,葉總裁似乎想畀個下馬威立法會,要求小組改變慣例,喺三粒鐘嘅聆訊期間小休兩次。搞乜呀?
帶兩名女將上陣
葉總裁喺當日會拖埋兩個女將一齊上場,佢哋分別係星展嘅香港及中國內地零售銀行業務總監董事總經理王潔鳳,以及零售銀行業務零售投資及保險產品高級副總裁莊希。
聆訊由九點半直踩到中午十二點半,按慣例通常到十一點左右會休息十五分鐘。不過前排葉總裁去信小組話,三粒鐘嘅聆訊好「extensive」同「intensive」,大意即係聆訊既廣且深,擔心粒半鐘先抖一次會不利證人身體狀況,所以要求小組改為一粒鐘就休息一次。
老實講吖,葉總裁又唔係單拖上陣,而係一拖二,仲係清一色女將添,正所謂三個女人一個墟,你一句、佢一句,好快又係時候講拜拜,使乜咁驚青呀!
有小組委員知道葉總裁嘅要求後,講笑話可能係啲賓架驚上立法會驚過頭,擔心聆訊期間嚇到尿急,所以咪提出個咁嘅要求囉,仲話除非葉總裁交張醫生紙證明,真係有咁嘅需要先算啦!
問過雷曼小組主席何鍾泰,佢話冇理由為咗一位證人而改變習慣,否則對之前嘅證人唔公道,所以決定維持原狀。即係請葉總裁食檸檬啦!
