小白觀點：阻人搵食罪大惡極
國泰空服員工會向資方發出「最後通牒」，恐嚇禮拜二可能展開工業行動。大劑！聽日正正就係復活節長假期最後一日，好多人趕住飛返嚟，你知啦，阻住人搵食有幾咁罪大惡極o架啦，有乜阻滯搞到開唔到工，乘客扯起火上嚟燒飛機都似！
姑勿論邊個唔啱，輿論上，空服員好明顯處於下風，工會成日打住「高層冇面見人」嘅口號，之但係資方已經肯讓步見人，願意喺協議中剔除爭議條款，仲諗住簽署協議解決工潮，但係工會竟然一口拒絕，畀人一種咄咄逼人嘅感覺，同情分輸晒。
仲有呀，打工仔依家爭取緊最低時薪三十蚊，但空服員嘅時薪講緊係過百蚊，單係銀碼上，已經好難令人覺得佢哋待遇差。弊在同人唔同命，冇洗碗服務員工會幫餐飲業勞苦大眾出頭，否則搞個全港罷洗碗都咪話唔壯觀！
e-mail：sunsiupak@gmail.com
Blog：http://sunsiupak.blogspot.com
阿豪觀點：贏道理唔一定抵幫
國泰空中服務員同資方嘅爭拗未有結束迹象，雖然管理層放咗聲氣，話會剔除備受爭議嘅條款，同埋加強同工會溝通，不過工會好似仍然唔係幾肯收貨，直至尋日執筆嘅時候，都未話取消嚟緊嘅工業行動。換句話講，即係話喺外地旅遊要返香港返工嘅朋友可能比較麻煩嘞，分分鐘要左轉右轉至返到嚟！
豪伯之前都睇過空姐寫嘅博文，根據佢哋所講，如果採用新嘅調更制度，的確會大大影響佢哋嘅原有福利，至於話合唔合理囉喎，就真係唔係外人可以三言兩語論斷嘞。
其實工業行動同革命鬥爭一樣，都係講究「有理有利有節」，就算今次真係空服員佔晒道理，如果結果影響到大部分旅客，咁輿論都未必會幫佢哋，到頭嚟咪仲唔抵！正如有網友話齋，不如學政黨咁搞街頭簽名，爭取市民支持好過啦！
e-mail：lukchiho75@hotmail.com
Blog：http://lukchiho.blogspot.com
網友觀點……
豬 郎：佢哋可以學政黨咁搞街頭簽名，睇吓有幾多人會支持！
阿 甘：第日外遊都係揀啲冇咁麻煩嘅航空公司。
賓 仔：冇興趣理佢哋啲勞資糾紛，但搞埋啲乘客就太唔應該！
小 山：畀空中服務員所累，遲咗返工老闆唔會詐型啩……
有料爆
可樂唔止好飲，仲可殺精添，幾蚊支真係抵。
SMS傾埋一份：6016 2496