班苦主學員講起就一肚氣，好多人啱啱買咗新套票，根本未用過。有位退休人士日前被職員游說，一次過交咗萬七蚊；有位女士仲慘，會籍費加埋各項服務費用一共交咗二十萬。話時話，瑜伽中心明知財政有困難，仲喺度搏命招客，呢種做法確實有好大問題。正如有學員話齋，上星期仲賣緊套票，依家就執笠，「擺明係騙局啦！」

其實，咁嘅事都唔算係新聞嘞。本港預繳式消費不嬲無王管，消委會近年收到大量涉及美容、纖體、旅遊會籍、收費電視等不良營商手法嘅投訴，其中好多涉及預繳式套票服務，消費者參與計劃後得唔到相關服務，只能自嘆倒楣。

講真，近年嘅消費陷阱五花八門，無奇不有，令人大開眼界。例如有纖體公司以「尋找代言人」作招徠，呃市民參加「免費」減肥，如果成功減肥就唔收錢，仲可以做公司代言人。其實邊有咁大隻蛤乸隨街跳呀，客人要先付款，話係表示誠意喎，等到完成療程後至分期攤還，結果纖體公司故意放慢手腳，顧客根本達唔到標，所謂免費，純屬搵笨。

另外一種搵笨手法係，當有美容纖體公司倒閉，其他美容公司就會向買咗套票嘅客人發手機短訊，話可以繼續向佢哋提供免費服務咁話。其實，所謂免費服務，係要購買美容公司同等價值嘅套票，原先嘅套票先至可以用。

叮！咁嘅經營手法直情係博懵，甚至有詐騙成分啦。但奇怪嘅係，當受害人向警方投訴，警方就話唔係刑事罪，冇辦法理；而向消委會投訴，消委會就淨係識得呼籲消費者帶眼識人，唔好上當受騙噃。叮，鬼唔知阿媽係女人咩。

講開又講，本港現行法例對預繳式消費毫無保障，如果店舖倒閉、轉手或者易名，消費者分分鐘一無所有，就算入稟法庭追討都冇用。好明顯，堵塞漏洞嘅唯一辦法就係修改法例，加強監管。其實，舊年當局就話要將美容同纖體納入《商品及說明條例》規管範圍，可惜始終得個噏字。

叮，香港假假地都叫做法治社會，又係購物天堂，但現時通街都係消費陷阱，令顧客防不勝防。如果政府再係懶懶閒，任由不法商人為所欲為，唔使幾耐，香港就會變成消費者地獄，購物天堂呢塊招牌可以摺埋咯！