小白觀點：學生被拉晒聽殺校

警方近排忽然大發神威，繼憑一支尿破K仔快餐車之後，又搗破咗一個黑幫「學生兵團」，捉咗成三十個學生，認真誇張。小白老弟希望警察叔叔高抬貴手，捉壞人唔係話唔啱，但下下咁捉幾十個，學校冇晒學生，想唔殺校都唔得啦。

講開又講，今次行動仲捉咗一個只係得十五歲嘅毒品拆家，令到好多人大驚小怪。查實依家啲小朋友個個人細鬼大，十幾歲嘅性經驗肯定多個佢幾廿歲嘅父母，做毒品拆家有乜咁奇吖。

要講奇，都唔夠英國嗰單咁奇，話說有個十四歲小朋友買金魚累到檔主畀警察拉，罰一千鎊之外，仲要戴兩個月電子監察帶。因乜事咁慘情呢？唔通英國又有「金魚婆」出沒？哦，大家有所不知，原來當地最近立咗一條「十六歲以下人士不得買寵物」怪例，怕呢啲小魔怪心理變態起嚟會虐殺寵物呀！

Email：sunsiupak@gmail.com

Blog：http://sunsiupak.blogspot.com

阿豪觀點：逃學威龍續集慘淡

警察又憑「逃學威龍」建奇功，今次係喺屯門多間中學，拘捕咗幾十個學生，聽聞最細嗰個得十三歲，有個毒品拆家得十五歲添咋！又話依家青少年係失業重災區？

不過，現實中警方派臥底入校園查案，始終唔夠電影咁吸引，大家禮拜六、日喺屋企打開電視，經常都會唔覺意睇到呢一套經典，唔知點解硬係百看不厭，每次睇到星爺畀老師掟粉刷仍會會心微笑。警方真人版逃學威龍就唔同嘞，第一次，大家都好有興趣八吓到底個師姐嘅廬山真面目，今次警方再用同一條橋，大家已經再冇乜興趣，反而關心番啲正經嘢，好似話點解屯門區黑社會咁肆虐，可以大肆招攬學生呢？

不如咁啦，為免學生哥被標籤化，當局可以考慮喺屯門搞個「自願洗底計劃」，怕且到時又好似大埔咁出現零個案，咁就可以改善屯門學生嘅形象嘞！

Email：lukchiho75@hotmail.com

Blog：http://lukchiho.blogspot.com

網友觀點……

威龍：未成年法庭唔慌判得重，佢哋根本冇有怕！

cherrygigi：既然呢招咁好用，不如就次次都用呢招嚟捉人啦。

排骨仔：黑幫踢咁多細路入會，少年警訊應多做啲嘢抗衡。

小山：以前學生搵外快都係幫人補習啫，諗唔到會做拆家！