辭咗職嘅公文袋前立法會議員Tanya陳淑莊最近聲稱畀人「迫遷」，做乜咁大鑊？原來佢喺○七年選區議會之前，租咗灣仔李節花園一個單位，一住三年，佢話過去每年同業主續約都好順利，而租約喺下個月十四號到期，即補選前兩日，點知上個月業主透過經紀話要收番層樓自住，要求佢準時喺十四號租約期滿前搬走。佢知道後即刻打咗個突，希望業主通融一陣，起碼等佢住到補選完先搬走，但業主企到硬，一日都唔肯遲。
Tanya話一直同業主關係唔錯，質疑唔知係咪因為對方係中資公司背景，唔鍾意佢辭職至唔租畀佢，但既然有白紙黑字嘅合約，惟有急急搵地方搬。翻查田土廳資料，Tanya嘅單位屬於中國太平洋保險（香港）所有，而太平洋保險發言人回應話，單位要用嚟做員工宿舍，佢哋依足合約要求嘅程序去做，完全不涉政治。
再過個半月就舉行補選，Tanya既要補選又要搬屋，仲要搵番個新竇，睇嚟會好唔得閒！