03/04/2010

播放本新聞相關短片

政情:林鄭暗批煲呔曾亂分工

發展局局長林鄭月娥尋日上電台再為強拍條例解畫,但醉翁之意不在酒,實際係想「洗底」。林鄭多番澄稱自己唔係好打得,亦唔係好強硬嘅人,好似「獨斷獨行」、「剛愎自用」呢類形容詞同佢作風唔係好脗合喎,佢仲話:「其實我係好樂於妥協,亦希望將事件做好,所以好打得形象就似乎同事實唔係好接近囉!」

林鄭進一步指「好打得」呢個形容詞好影響市民觀感,導致先入為主認為某一官員純粹靠「好打得」嚟推動政策,一來唔係咁好,二來會令人覺得「好打得」等於好捱得、好做得,所以好多工作都係發展局一力承擔,可惜每個政策局人力資源有限,唔能夠無止境加強下屬工作量。

佢咁講,變相暗批煲呔曾分配工作不均,將啲大纜都扯唔埋嘅工作推晒畀發展局。不過,俗語有云:「牛唔飲水就唔㩒得牛頭低」,分分鐘可能係林鄭為咗爭取表現,對啲新工作來者不拒都唔奇。

對於近期推銷強拍而被炮轟,林鄭歸咎同工作崗位有關,好似當年做社會福利署署長時,推行一筆過撥款或綜援金改革都惹起爭議,到依家做發展局局長,亦由於工作同土地及發展息息相關,好不幸地市民對地產商嘅觀感反射喺官員身上,令佢感到好無奈喎!

就因為一筆過撥款,早前班社工就發起罷工遊行抗議,搞到接手署長嘅余志穩一身蟻,要幫林鄭執「蘇州屎」,咁究竟邊個無奈啲呀?