再有政要踏上當日嘅肇事現場，大家當然好想知道金刀梁有乜特別感受啦，點知佢唔肯正面回答，只係好不經意咁講咗句：「有啲人有時係太過激烈嘅。」完全答非所問。被問到覺唔覺得政府同年輕人嘅溝通唔足夠，佢就繼續「閃避」問題，只係話溝通呢樣嘢係永遠都唔足夠喎。

籲政府多搞青年峰會

早前嘅青年高峰會議畀人彈到一文不值，透明度低之餘又冇公開諮詢，金刀梁認為政府搞一兩次呢類型嘅活動，可能未必啱晒每個人嘅口味，但只要做多幾次，就一定會有進步。佢又話，自己作為一個七十歲嘅長者，最鍾意同唔同年紀嘅人溝通同對話，因為唔同年紀嘅人心態都唔同，溝通多啲可以學識用唔同角度睇嘢喎。

睇嚟唐唐唔單止要學吓金刀梁咁同年輕人多溝通，如果學識佢一半嘅「閃功」嘅話就更加好嘞，起碼下次畀人掟鞋都識得閃，而唔係扮睇唔到咁失禮。