本文重點
為慶祝成立六十三周年，順德聯誼總會前晚搞咗個會員聯歡會，身為首席榮譽會長嘅「四叔」李兆基冇嚟撐場，唔知關唔關天匯事呢？恒基地產部執行董事孫國林就拍心口話絕無其事，因為四叔根本唔係咁嘅人。孫國林喺恒基做咗十幾年，當年佢喺舊公司做咗成二十年，後來因為想轉環境，加上四叔好有誠意力邀佢過檔，所以就過咗去幫四叔手。
包員工午飯下午茶
四叔對員工好係人都知，好似早幾年娶新抱，員工每人獲發一封萬元利是「齊歡暢」；○八年初四叔見兆基財經業績令人滿意，加上嗰年抱孫兼攞埋大紫荊勳章，又私人醒伙記每人一萬元利是過年；舊年年尾個巿有起色，佢又請同事去海南島旅行。咁都唔止，仲有一樣真係依家冇幾多間公司做得到，就係包飯嘞。
孫國林話公司咁多年都係包員工伙食，上上下下一齊食晏；到三點三，又會有下午茶，雖然只係一個包、一件餅，但都睇得出四叔唔係孤寒財主。