03/04/2010

播放本新聞相關短片

政情:褲王趁高位沽商廈

樓價係咁升,唔少想買樓嘅人驚蝕底,連居屋、公屋都殺,但自嘲「神經富豪」嘅「褲王」、旭日集團董事長楊釗就唱反調,年初講到明唔會貿然入貨,睇定啲再算。話口未完,楊釗同家族成員日前又沽出灣仔駱克道博滙大廈全幢,帳面袋三億八千萬元。

預測整頓樓市有料到

褲王投資地產同樣出色,佢善於喺高位沽貨圖利,被譽為地產奇才,但近年佢沽多買少,即使樓市熾熱,仍然忍手。

早前喺機場巧遇佢,佢解釋忍手有原因,話今年無論內地政府同特區政府,都有決心出招整頓樓市,招數係乜?力度有幾大?仍係未知之數,但佢預測整頓招數可能有啲料到,否則搔不着癢處喎。為免買錯嘢,佢寧願按兵不動,今年唔入貨住。睇番佢最近頻頻沽貨,果然坐言起行。