消防隊目「傑佬」楊俊傑喺長沙灣麗昌工廠大廈四級火中不幸殉職，唔少消防手足都抱怨人手同消防設備唔夠。消防處一哥盧振雄為挽回士氣，連開三場答問大會，話聽吓下屬嘅訴求喎，睇落好似幾有誠意，點知原來入到場，發現處方果然好有效率，話咁快就加咗「裝備」。係乜？竟然係攝錄機。
每次坐足三粒鐘
消防處喺上禮拜三、尋日同聽日，喺廣東道消防局舉行三場答問大會，唔少消防手足都有嚟，希望表達對部門嘅不滿。唔知係咪為咗疏導怨氣，盧處長每次都有現身，兼且次次坐足三粒鐘。
由於首次答問大會氣氛唔錯，班手足以為有好開始，點知到咗尋日，啲手足一入去坐低就發現有啲唔對路，點解有攝錄機對住自己嘅？有消防員同傳媒講，同袍講嘢都顯得好避忌，好多嘢都唔敢講，唔能夠暢所欲言，驚第日畀人秋後算帳，甚至影響升職。
嘩！咁都得？畀部攝錄機對住，個個都變啞啦！盧處長係咪有心聽班下屬訴苦o架，抑或係信唔過班手足？若果係咁，不如唔好開啦！
不過，消防處發言人回應，話班手足諗得太多，實情係大會可容納人數有限，若坐滿咗，其他同事就要坐另外兩間房，錄影只係為咗即場轉播，錄影完之後就會刪除，絕對唔會留底，更加唔會攞嚟秋後算帳。同事即場可以具名表達意見，亦可唔具名，而具名嘅同事，部門第日會書面覆番，唔具名嘅同事，部門會透過內部通訊回覆。
內部溝通有度牆
召開答問大會本來係一件好事，但就搞到你估吓我、我估吓你，消防處嘅內部溝通似乎真係有度牆，呢度牆要點樣打冧，就要睇吓盧處長有乜板斧嘞！聽咗兩次答問大會，班手足最關心嘅係無線電通訊系統接收欠佳、抗火衣不足、人手又經常唔夠，要其他局嘅伙記頂更，署任嘅情況亦頗嚴重，盧處長聽到後，有幾多期票可以兌現到呢？