呢，「港產城管」又發惡喇。有位患痛風嘅八十歲婆婆前日由個仔陪同，去到柴灣街頭擺賣雜貨，期間突然殺出三個販管隊人員，警告都冇句就票控婆婆阻街。失驚無神畀官告，兩母子同對方理論，仲出示合法流動小販牌照，認為自己冇犯法。由於情緒激動，婆婆感到不適，圍觀嘅幾十個市民睇唔過眼，指摘販管隊欺凌老弱。販管隊人員見群情洶湧，急Call上峰及警方求助。

援軍大陣仗咯，廿幾名販管隊人員加十名警員對付一對手無寸鐵嘅母子，咁都唔夠強，連警犬都出埋。睇見咁嘅場面，唔知頭唔知路嘅，仲以為好似早幾日嘅莫斯科咁，發生自殺式恐襲添。官強民弱，兩母子除咗無奈接受被票控，仲邊有路行呀？婆婆更因為激氣過頭，要送醫院治理。

叮！販管隊執法係啱，票控違規亦冇錯，但法律不外乎人情，唔係有權執法就大晒。婆婆係有牌流動小販，在情在理販管隊都有責任向老人家解釋清楚，而唔係搞突然襲擊。再講，婆婆擺檔嗰條行人通道有十幾米闊，賣嘅只係普通家居雜貨，既冇製造垃圾，又冇整污糟環境，販管隊對一位八十高齡嘅婆婆，點解唔可以高抬貴手，係都要趕盡殺絕呢？退一萬步，就算一定要老人家離開，使唔使如臨大敵，連警犬都上埋陣呀？咁做只會令市民怨氣更大，如果引發大規模警民衝突，呢隻鑊，販管隊又孭唔孭得起先？

叮！冇計啦，「港產城管」同佢哋嘅內地同行冇乜區別，一向做慣惡爺。嗱，有位七旬老伯喺中環擺檔擦鞋十六年，舊年年中接連兩日畀食環署票控阻街同無牌經營，連鞋箱等謀生工具都充埋公，你話係咪野蠻執法吖！

激到人氣咳小兒科咋，惡起上嚟，逼到人跳樓都唔出奇o架。呢，今年農曆新年前，有小販入咗大批鮮花想賺番筆，點知啲花仲未卸落車就被食環署人員以阻街為名全部充公。小販血本無歸，走上食環署大樓準備跳樓自殺，好彩畀人勸番落嚟。

仲有更恐怖o架，前幾年新界有小販畀販管隊追到落荒而逃遇溺身亡；亦試過有小販「走鬼」，被追出馬路畀車撞傷。總之見到佢哋即刻兜路行，咁就包穩陣嘞。

早排有內地網民將北宋名畫《清明上河圖》惡搞成《清明上河圖之城管來了》，原本嘅熱鬧街景，被城管打砸一輪之後，剩低一地爛枱爛櫈。計太一叮話齋，如果有港版《清明上河圖之販管隊來了》，上面睇怕連枱櫈都冇埋。何解？一聽到佢哋個大名，莫講話小販，枱櫈都生埋腳，有咁快走咁快啦。叮！