小白觀點：可憐考生一戰失江山

老師成日教「一分耕耘一分收穫」，以為準備充足應試，就一定可以拎到好成績呀？同學仔千祈唔好當真呀！就講近日高級程度會考聆聽試之嘛，紅外線系統中斷就賴甩插蘇，點知用番傳統電台廣播系統，一樣收到沙沙聲。考生一戰定江山，以後食粥食飯靠晒呢個試，真係多得佢唔少。

冇辦法，考評局出晒名官僚，年年公開試都醜態百出，今年又話有試題外洩，佢哋繼續好官我自為之。講到呢度，小白老弟真係戥清朝一位考官唔抵囉，佢有次將試題外洩，又衰戇居冇話係補習天王太勁貼中，亦冇話有人種生機搵五鬼撻走試卷，最慘係冇人同佢寫求情信，話佢平時係一個孝順仔又唔搞細路，結果畀劊子手又拉又鋸又將佢斬成兩截，搞到佢喺地上連寫七個「慘」字。唉，希望佢已經投胎輪迴，今世做考評局補番啦！

e-mail：sunsiupak@gmail.com

Blog：http://sunsiupak.blogspot.com

阿豪觀點：轉凉性質做聽力測試

高級程度會考聆聽試問題多多，繼部分改用紅外線系統嘅聆聽試場爆出播放中斷後，使用傳統電台廣播系統嘅部分試場亦同樣嚴重接收不清。今次班考生真係畀考評局玩死！

咦，或者會唔會係咁呢，其實所謂聆聽測驗，已經不知不覺轉咗性質，成為聽力測驗Hearing Test呢？各位同學，你哋聽唔到聲，其實可能係考評局將音量校細咗咁解啫……

至於點解大部分考生都聽唔到，原因好可能係大家聽得太多mp3，搞到有咗所謂「iPod耳」自己都唔知。係嘞，咪有條政府宣傳片，叫人要小心過馬路，行街時唔好將耳機音量校到咁行嘅，結果嗰個人因為聽唔到其他人叫佢睇車，而被撞到飛起。如果呢個宣傳片拍續集，大可以改成個主角成日聽mp3，結果搞到連Listening都聽唔到，咁仲有阻嚇力啦！

e-mail：lukchiho75@hotmail.com

Blog：http://lukchiho.blogspot.com

網友觀點……

阿　木：考評局算好彩，班考生若然係激進嘅「80後」實有排你煩！

周　仔：紅外線系統失靈，唔知考評局又要掟幾多錢調查呢？

孫　山：未認真測試好接收效果就當試場，太兒戲喇！

華　安：老問題始終解決唔到，影響考生正常發揮實在唔公平！

有料爆

昂坪360搞電玩主題車，不如搞安全好過！

SMS傾埋一份：6016 2496