匯賢智庫嘅立法會議員葉劉淑儀上月尾帶團去美國矽谷考察，一行三十人連日嚟四出參觀矽谷嘅科技公司同研發中心，仲同當地業界會面交流。葉劉前日就去著名嘅互聯網設備供應商美國思科系統（Cisco）參觀。
Cisco嘅正門放咗個巨型電話做擺設，葉劉一見到就忍唔住撲埋去同個電話筒合照。Cisco開發咗一套網絡硬件，令醫生可以透過視像系統「巡房」，慳番唔少睇症時間，葉劉又即席扮醫生，一嘗安坐房間「遙控」診症嘅滋味。真係乜都玩餐飽喎！
快樂嘅時光過得特別快，葉劉一行人聽日就會起程返香港。佢返港後，櫈仔都未坐暖又要喺九號率領一班大專生坐高鐵去武漢考察，一連三日嘅行程只需五百蚊，佢當然要扲荷包津貼，所以一百二十個名額早喺兩個月前已經爆滿。