富貴黨副主席兼立法會飲食界議員張宇人早前發表「廿蚊論」，之後畀人揶揄叫「廿蚊張」，搞到富貴黨雞飛狗走，反觀同佢哋爭緊同一班選民嘅經濟動力就大有穩步成長之勢，此消彼長下都幾蝕底。不過，富貴黨主席Miriam劉健儀尋日同傳媒茶敍時就話，冇諗過同經濟動力再結合，因為大家嘅核心價值唔係好一致，例如喺直選嘅議題上意見有好大分歧。
Miriam認為富貴黨同經濟動力最唔同嘅地方，係對方「好聽話」，仲暗寸對方喺最低工資上唔肯表達立場，至避過各界抨擊。雖然Miriam呢番見解頗有見地，但依家風頭火勢，咁講亦未免太酸溜溜喇！
廿蚊張嘅餘波未了，有黨嘅區議員因而退黨，分分鐘引發新一輪嘅退黨潮。雖然Miriam不斷強調今次危機係畀廿蚊張拖累，但呢件事無可避免成為其他政黨攻擊富貴黨嘅論點，嚟緊嘅區議會選舉都唔知點算。
另一邊廂，由富貴黨分裂出嚟嘅成員好似愈撈愈有，好似之前有份搞散富貴黨嘅李大壯，就啱啱被委任做香港—台灣商貿合作委員會主席。