東華三院尋日舉行新一屆董事局成員就職禮，李三元正式交棒畀新主席Billy梁定宇。Billy由總理到主席，喺東華足足服務咗九年，但舊年做第一副主席就好似「潛咗水」咁，比較低調，Billy話係因為做主席要瞓身落去做，舊年要先將家族生意打點好，等今年做主席無後顧之憂。
Billy嚟緊要履行做東華主席嘅責任，今個復活節冇得去玩，要去東華義莊主持拜祭儀式。
做得東華主席，好多活動都要參與，雖然少咗私人時間，Billy都冇話後悔，難得老婆好支持，除咗每晚準備愛心湯水幫老公打氣外，仲幫老公打理生意，絕對係稱職賢內助。
至於升呢做顧問嘅李三元亦力撐Billy冇失蹤。佢話連埋醫院在內，東華每年營運涉及嘅款項達四、五十億，做主席責任重大，Billy舊年先安頓家業好應該。李三元兩個仔都好有興趣做善事，咁幾時入埋東華呢？佢笑言：「佢哋搵到錢，想幾時加入我都支持。」