理工大學有教職員早前發公開信，力數校方管理層喺過去十年期間賤賣理大資產同涉及利益衝突等「九宗罪」，矛頭直指前任理大校長潘宗光（圖）在任期間嘅領導班子，現任校長唐偉章最後宣布成立獨立小組檢討學校各附屬公司嘅理財狀況。
前日喺一個晚宴見到潘宗光，當然問佢點樣回應「九宗罪」嘅指控啦，但無論點問都好，佢都係笑笑口咁話：「有關問題要留畀理大新領導班子回應，我唔適合答呢啲問題。」由於有指控涉及佢在任時嘅事情，問理大有冇邀請佢提供資料，佢都係重複同一個答案，話「清者自清」。
咁又係嘅，唐偉章早前承諾喺三個月內就「九宗罪」嘅指控向校董會提交報告，咁件事調查緊，潘宗光封嘴都好正常。
其實，潘宗光喺○八年底退休後好低調，依家係上市公司嘉華國際、理文造紙同合和公路基建三間上市公司嘅非執行董事。根據港交所嘅股東權益披露，至今年三月二十四號為止，佢先後分四次減持理文造紙股票，價位喺六蚊左右，套現逾六百萬元。